RSS Feed
Twitter
Mebendazole ជាប្រភេទថ្នាំ ប្រើសម្រាប់ទម្លាក់សត្វល្អិត ឬទម្លាក់ព្រូន ដែលមានដូចជា ព្រូនចង្កឹះ ព្រូនមូល និងព្រូនទំពក់។ ថ្នាំ Mebendazole គេអាចប្រើបានតាមរយៈការលេបតាមមាត់ ដោយអ្នកអាចលេបរួមជាមួយអាហារ ឬលេបតែថ្នាំមួយមុខតែឯង។ អ្នកអាចទំពារ ហើយលេប ឬលេបទាំងមូល ឬអាចលេបលាយជាមួយអាហារតែម្ដង។
សម្រាប់កម្រិតថ្នាំ ដែលត្រូវលេប គឺអាស្រ័យទៅតាមស្ថានភាពសុខភាពរបស់អ្នក និងកម្រិតថ្នាំប៉ុណ្ណាទើបខ្លួនអ្នក អាចទទួលយកបាន។
ចំពោះការព្យាបាលអ្នកជំងឺដែលរងការបង្ករោគដោយព្រូនចង្កឹះ អ្នកអាចឲ្យអ្នកជម្ងឺលេបថ្នាំ Mebendazole តែមួយលើក គឺអាចទទួលបានលទ្ធផល។ ប៉ុន្ដែ បើចាំបាច់ អ្នកអាចឲ្យអ្នកជំងឺ លេបម្ដងទៀត នៅប៉ុន្មានសប្ដាហ៍បន្ទាប់។ ចំពោះការបង្ករោគដោយប្រភេទព្រូនដទៃទៀតដូចជា ព្រូនមូល ព្រូនទំពក់ អ្នកអាចឲ្យពួកគេលេបថ្នាំ Mebendazole តាមមាត់ចំនួន ៣ ថ្ងៃ ដែលជាធម្មតា គេច្រើនតែលេប ២ ដង ក្នុង ១ថ្ងៃ គឺ ព្រឹក ១ ដង និង ល្ងាច ១ ដង ឬជាការប្រសើរ អ្នកអាចទៅជួបវេជ្ជបណ្ឌិត ដើម្បីសួរបញ្ជាក់ឲ្យច្បាស់អំពី របៀបនៃការប្រើថ្នាំនេះឲ្យបានត្រឹមត្រូវ។ ពេលនោះ លោកវេជ្ជបណ្ឌិត អាចនឹងឲ្យលេបថ្នាំ Mebendazole នេះច្រើនជាង ២ ដង ក្នុង ១ ថ្ងៃ និងអាចលេបច្រើនជាង ៣ ថ្ងៃ អាស្រ័យនឹងស្ថានភាពសុខភាពររបស់អ្នកជម្ងឺ។ ដូច្នេះ ប្រសិនបើអ្នក មានបញ្ហាព្រូននេះ កើតមានលើខ្លួនអ្នក អ្នកគួរទៅជួបពិភាក្សាជាមួយវេជ្ជបណ្ឌិត ឲ្យបានត្រឹមត្រូវ ដើម្បីទទួលបានលទ្ធផលល្អ ក្រោយពេលព្យាបាល។ សូមបន្តការលេបថ្នាំ តាមវេជ្ជបញ្ជារបស់គ្រូពេទ្យ ដែលបានណែនាំឲ្យបានខ្ជាប់ខ្ជួន។ សូមកុំបន្ថយ កម្រិតថ្នាំដោយខ្លួនឯង នៅពេលដែលអ្នកឃើញស្ថានភាពជម្ងឺរបស់អ្នកបានថយចុះ។ កាលណាអ្នកបញ្ឈប់ការប្រើប្រាស់ថ្នាំ មុនពេលកំណត់ លេបថ្នាំមិនបានគ្រប់កម្រិតរបស់វា ការបង្ករោគរបស់ព្រូន អាចនឹងកើតមានឡើងវិញ។ យ៉ាងណាមិញ ប្រសិនបើស្ថានភាពជំងឺ មានការប្រែប្រួលខុសធម្មតា ឬវិវត្តកាន់តែធ្ងន់ សូមប្រញាប់ទៅជួបគ្រូពេទ្យជាបន្ទាន់ ដើម្បីកុំឲ្យមានគ្រោះថ្នាក់ដល់អាយុជីវិតទាន់៕ - narin
ប្រភព: ត្រួតពិនិត្យដោយ www.health.com.khថ្ងៃទី23 ធ្នូ ឆ្នាំ2014
